【官宣】費倫巴治辭退摩連奴　生涯第7次被炒

費倫巴治周五(29日)官方宣布，即日起辭退主帥摩連奴，據報「摩dad」與費倫巴治尚餘10個月合約，將獲得賠償金875萬歐元(約7,960萬港元)，亦係佢執教生涯第7次被炒。

62歲嘅摩連奴去年7月執教費倫巴治，簽約2年，合約總值2,100萬歐元，領軍14個月共62場比賽，錄得37勝14和11負戰績，未有錦標落袋，雖然往績顯示「摩二季」多數有冠軍，但依家已經冇機會。

費倫巴治炒佢理由亦好簡單，就係歐聯附加賽兩回合合計0比1輸畀賓菲加，無緣正賽，就係出局36小時後，宣布辭退摩連奴。

回顧摩連奴執教生涯，只有執教波圖同國際米蘭有好結局，其餘總共有7次被解約或辭退，包括2007年9月被車路士解僱、2013年夏天與皇馬解約、2015年12月被車路士第2次解僱、2018年12被曼聯解僱、2021年4月被熱刺解僱、2024年1月被羅馬解僱。

摩連奴應該仲會繼續教波，下一站去向廣受關注，最大機會是重返英超，曼聯及諾定咸森林是熱門去處，亦有報道分析指摩連奴可能更換賽道執教國家隊出席世界盃，不過葡萄牙今夏剛捧走歐國聯，換帥機會不大，但相信對佢有興趣嘅國家隊為數不少。