菲歷斯首戰「帽子戲法」　搶晒C朗風頭

周六(30日)凌晨沙特阿拉伯職業聯賽，艾納斯第一擊旗開得勝，作客以5比0大勝艾塔亞文，上月底新加盟前鋒祖奧菲歷斯表現光芒四射，上演「帽子戲法」入3球，搶晒巨星拍檔C朗風頭。

艾納斯早前喺香港失落沙超盃，但並冇影響出戰聯賽士氣，開賽7分鐘，祖奧菲歷斯喺禁區內起腳射入打開紀錄。艾納斯控制大局，繼續狂攻對手，換邊後冇耐，艾塔亞文「送禮」，有球員喺禁區內犯手球，被判罰12碼，C朗主射入網，為艾納斯領先至2比0。

轉個頭京士利高文射入1球，亦呢位法國國腳8月中由拜仁慕尼黑加盟艾納斯後，首次入波。跟住祖奧菲歷斯再入2球，佢自2019年後首次上演「帽子戲法」，當時仲效力緊賓菲加。

祖奧菲歷斯近年淪為「人球」，曾效力馬體會、巴塞隆拿、車路士、AC米蘭，表現都未如理想，今次去沙特跟隨同胞C朗搵食，終於獲得重生，包括早前沙超盃4強對伊蒂哈德入1球，呢位25歲葡萄牙國腳為艾納斯上陣3場入4球，作用更勝C朗，艾納斯用2,620萬鎊向車路士收購呢位「新C朗」絕對超值。