阿諾特上「艦」冇運行　落選英格蘭大軍名單

英格蘭國家隊主帥杜曹公布出戰9月初世界盃外圍賽嘅24人大軍名單，今夏由利物浦轉投皇馬嘅右後衞阿歷山大阿諾特落選，可能同佢狀態欠佳，失去「銀河艦隊」正選有關。

「三獅兵團」有4位主力因傷無緣入選，包括高爾彭馬、祖迪比寧咸、布卡約沙卡、利維高維爾，但阿歷山大阿諾特冇病冇痛卻落選，比較令人意外。

英國傳媒分析指呢位26歲右閘加盟皇馬後，表現令人失望，首輪西甲對奧沙辛拿，踢咗68分鐘就被換走，上場對奧維多，教練沙比阿朗素將佢貶為後備，寧願用33歲老將丹尼爾卡華積擔正，阿諾特要等到87分鐘先至後備入替。

杜曹似乎都認同沙比阿朗素決定，今次寧願揀選2位邊緣國腳後衞迪積史賓斯、利夫拿文度，都唔要阿歷山大阿諾特。同人唔同命，同樣今夏轉戰西甲嘅前鋒拉舒福特獲得徵召，至於效力諾定咸森林嘅22歲中場安達臣首次入選。

英格蘭將於9月7日凌晨世盃外主場對安道爾，3日之後作客塞爾維亞。