【官宣】熱刺終於簽到人　沙維繼承孫興民7號波衫

熱刺終於簽到進攻球員，正式宣布買入RB萊比錫翼鋒沙維西蒙斯，雙方簽約5年，固定轉會費達6,000萬歐元(約5.5億港元)，呢位22歲荷蘭國腳獲得7號波衫，繼承早前離隊嘅隊長孫興民衣缽。

熱刺今夏曾經想收購麥比奧莫、洛迪高高斯、沙雲奴、伊比爾治伊斯，但都失敗，近日轉移目標斟介沙維西蒙斯，反而迅速得手，相信由於另一主要買家車路士退出爭逐，加上轉會市場即將關閉，所以RB萊比錫最終接受熱刺報價。

沙維西蒙斯簽約後話：「熱刺邀請我加盟，我立即答應，我會為球隊注新入量。」熱刺將於周六晚(30日)英超主場對般尼茅夫，沙維西蒙斯應該無法上陣，估計要等到國際賽期後，9月14日凌晨作客韋斯咸，先至上演「地標戰」。

沙維西蒙斯技術全面，可以勝任進攻中場及翼鋒，2年前被巴黎聖日耳門外借去RB萊比錫，一直有出色表現，包括上季上陣33場入11球及8次助攻，RB萊比錫今年1月豪花5,000萬歐元買斷佢，換言之，短短半年，呢支德甲球隊就從沙維西蒙斯身上賺到1,000萬歐元收入。