因一件事　貝迪斯放棄簽安東尼

貝迪斯今夏一直力爭簽入曼聯翼鋒安東尼馬菲奧斯，原本兩間球會已接近達成交易協議，但呢支西甲球隊突然宣布放棄收購，據悉因為安東尼要求曼聯補償「薪酬損失」，導致轉會未能成事。

安東尼馬菲奧斯上季季中被曼聯外借去貝迪斯後，有出色表現，上陣26場入9球及5次助攻，所以貝迪斯希望續借呢位25歲巴西國腳。不過，曼聯傾向直接出售安東尼，並要求4,000萬歐元轉會費，貝迪斯財力無法負擔，只能提供2,500萬歐元固定轉會費及300萬歐元浮動轉會費。

曼聯原本拒絕報價，但經過多次磋商後，最終同意貝迪斯要求，並加入轉售條款，如果貝迪斯將來以超過2,500萬歐元出售安東尼，曼聯可以分到50%轉會費。

當兩間球會準備拍板成交，貝迪斯周六(30日)凌晨發表聲明，指並未達成協議，亦冇為安東尼安排體測，並撤回報價。消息人士指安東尼同曼聯仲有2年合約，佢轉投貝迪斯後，需要減人工，要求紅魔鬼補償餘下2年合約「薪酬損失」，估計為400萬歐元。

曼聯唔想畀呢筆錢，貝迪斯稱冇能力負擔呢條數，如果曼聯無法同安東尼解決分歧，收購計劃就會取消。