祖奧柏度入波再護空門　車仔兩蛋贈富咸

周六早場「西倫敦打吡」，車路士2比0擊敗富咸，聯賽2連勝。車仔今場初段有利安戴納拉傷換出，但好在有祖奧柏度，佢不但先開紀錄，尾段仲靠佢護空門，幾乎一個打晒！

車路士高爾彭馬繼續養傷，尼干古同尼高拉斯積遜離隊，開賽14分鐘再有利安戴納拉傷被調離場，不過佢哋勝在人腳充裕，一樣冇問題。

21分鐘約舒亞京治破越位單刀射破車路士大門，但可惜之前有洛迪高梅尼斯犯規在先，球證翻睇VAR後判入球無效，富咸慘食詐胡，球隊亦氣勢大減。

車路士大難不死，踢到上半場補時9分鐘終於開紀錄，祖奧柏度在一次角球攻勢中捕個靚位，頭槌一頂入網為球隊領先1比0完半場。

下半場50分鐘，富咸賴恩施斯隆禁區內用手擋波犯手球，球證睇咗5分鐘VAR後判罰12碼，安素費南迪斯操刀破網，車路士贏到2比0。

戰至尾段富咸傾力反撲，一次角球攻勢幾乎搞掂，全靠祖奧柏度回防守尾柱護空門，入波係佢，防守又係佢，結果車路士淨勝2球完場。