【有片】唔敢睇絕殺12碼？艾摩廉：我知般費入硬


艾摩廉贏波後意氣風發。

曼聯周六(30日)英超靠補時7分鐘嘅12碼，主場3比2絕殺新升班嘅般尼。當般奴費南迪斯操刀關鍵12碼嗰陣，領隊魯賓艾摩廉「再次」擰歪面唔睇，不過同周中英聯盃射輸12碼出局唔同，艾摩廉賽後表示知道般費「入硬」，寧願睇球迷慶祝反應！

曼聯周中英聯盃喺互射12碼輸畀英乙甘士比，艾摩廉全程匿喺後備席唔敢睇，被球迷猛烈批評。今仗對般尼喺97分鐘出現12碼「絕殺」機會，而且係由上星期12碼宴客嘅般費處理，艾摩廉再次選擇坐喺後備席，晾起對腳Chill住咁望上天，被質疑又一次唔敢面對。

曼聯最終順利打響勝鼓，艾摩廉賽後解釋唔睇12碼原因：「我想睇球迷嘅反應，要發生嘅事點都會發生。喺嗰一刻，我諗緊曼聯贏波先係公平結果，我亦唔相信般費會連續2次射失12碼！」對於自己近期情緒化，呢位葡萄牙主帥表示：「我一向都好情緒化，尤其呢幾個月經歷嘅事，你哋應該明白點解。」