紐卡素開季3場不勝　禾達美迪現身做救世主

英超勁旅紐卡素夏天組軍多阻滯，開季成績大受影響，周日(31日)凌晨作客列斯聯被悶和0比0，開咧3戰只得2和1負成績，不過周六(30日)落實加盟嘅德國前鋒禾達美迪，今場已經喺看台露面，勢必成為「喜鵲」救世主！

紐卡素喺阿歷山大伊沙克罷踢、安東尼哥頓停賽下，今場只能用22歲小將韋利安奧索拿擔正，結果佢哋變成「冇牙老虎」，唔少傳中都係掠門而過冇人接應，全場兩隊加埋只得3次中龍攻門，最終0比0打成平手。

紐卡素周六官宣德國前鋒禾達美迪加盟，呢位6,900萬鎊轉會費新星，今場亦喺看台睇波，佢簽約後表示：「我好興奮，喺電視睇紐卡素已經覺得氣氛好瘋狂，好期待喺球迷面前比賽同入波。紐卡素嘅發展好好，又有歐聯踢，我想喺最高水平賽事證明自己。」