基亞利殊出「城」翻生　2戰4助攻創紀錄

周六(30日)晚英超，愛華頓作客以3比2擊敗狼隊，各項賽事3連勝，被曼城外借去愛華頓嘅中場基亞利殊大踢爭氣波，今場又貢獻2次助攻，成為「拖肥糖」史上首位連續2場英超助攻起孖嘅球員，若然可以保持狀態，有望重返英格蘭國家隊。

愛華頓反客為主，開賽7分鐘先開紀錄，基亞利殊頭槌二傳，由比圖比東卡近門頂入，雖然狼隊憑黃喜燦射入扳平，但「拖肥糖」好快由伊利文尼戴耶入波，再次領先。

換邊之後，基亞利殊送出直傳，達斯貝利賀爾順勢射成3比1，即使狼隊靠洛迪高高美斯入波追番1球，但無阻愛華頓全取3分而回，包括英聯盃在內，取得3連勝。

基亞利殊演出搶鏡，當選今場最佳球員，呢位29歲球星繼上輪對白禮頓貢獻2次助攻後，今場又助攻起孖，佢過去2季為曼城踢40場英超僅有2次助攻，但近2場聯賽為愛華頓披甲已有4次助攻，表現脫胎換骨。

雖然基亞利殊冇份入選最新一期英格蘭大軍名單，但只要保持水準，相信仍然有機會獲英軍主帥杜曹重召。