曼聯首擊血洗天鵝湖
2014/08/16
文:法達斯維
魔王落柯打攞頭彩立威
英超返嚟喇！今晚揭幕戰更係由「新魔王」尹戈爾領軍嘅曼聯主場火併「天鵝」史雲斯。尹帥恩威並施，成功激活沉睡多時嘅紅魔，撞正佢位「徒塞」蒙克教到史雲斯不倫不類，尹帥仲唔趁機要佢交吓學費，大勝番一場，打響新季頭炮立威，強弱懸殊下直取讓球主勝。
（now 621周六晚7時45分直播）
尹帥有料到 激活魔性
曼聯上季畀「天才」莫耶斯帶到冠軍變「阿七」，好似發咗場噩夢，會方決定搵嚟名帥尹戈爾重整旗鼓，正所謂人老精鬼老靈，呢名帶領人腳麻麻嘅荷蘭喺世盃奪得季軍嘅63歲老帥，揚言嚟到曼聯係攞冠軍唔係爭前四。雖然曼聯至今只係簽咗安達靴里拉及勞基梳爾兩名新兵，但尹戈爾認定球隊嘅問題係來自心理而非質素，因此一上任就致力激發球員鬥心，恩威並施，令成隊波嘅精神面貌大為改善，其中王牌朗尼罕有地喺季前熱身賽搏命，最終冧掂尹帥任命佢做新隊長。
尹戈爾縱橫教壇廿多載，徒弟徒孫滿天下，車仔領隊莫連奴正係佢得意門生，「寸王」其後又教出紅軍主帥羅渣士，曾經跟過後者嘅史雲斯主帥蒙克，論資排輩亦係尹帥嘅「徒塞」，級數差幾班。
撞正太師公 蒙克有難
不過，呢位隊長上季中途接替被炒嘅米高盧特立，毫無教波經驗，臨場指揮又唔掂，帶隊踢咗14場聯賽贏到5場，成績冇起色，能夠留級只係富咸、卡迪夫城唔爭氣，蒙克嘅料已經見晒底，今晚遇到「太師公」好難偷到雞。
「天鵝」雖然今夏免費簽入里昂「野獸」巴菲迪比高美斯，頂替被借走嘅射手米捷，拍住韋菲特邦尼火力叫做仲keep得住，但因為將門將禾姆同後衞賓戴維斯打包賣畀熱刺，防線又要重新夾過，加埋中場核心里安比頓因傷倦勤，咁嘅條件下試問蒙克如何扭轉乾坤？何況今仗更係尹戈爾登陸英超嘅處子戰，又喺主場出擊，誓要頭威頭勢，好大機會血洗天鵝湖，讓球主勝咪錯過。