Football

意大利土耳其半和有計

2021/06/11 00:00

歐國盃開打!揭幕戰鬥穩陣

歐洲國家盃今晚正式開波,揭幕戰上演A組意大利主場對土耳其!意大利近8場賽事全勝,保持不失球,表現攻守兼備,但當中部分係熱身賽,不宜高估,加上今場係揭幕戰,預料意軍會額外小心,避免輸壞個頭,上半場應會先作試探。至於土耳其作客更加會以穩守行先,考慮到雙方近3次對賽上半場都打和,一於再追半場和。

(Viu TV 99、Now 618及616周六凌晨3時直播)

意大利2018年由文仙尼執教後,表現平穩,上場熱身賽靠兩位射手恩莫比尼及恩斯治尼入波,以4比0大勝捷克,打起球員鬥心。「藍衫兵團」近8場賽事全勝兼不失球,創下意大利史上向對手連續「派蛋」最長紀錄,而且已經保持2年零9個月不敗,整體實力絕對喺土耳其之上。不過,嚟到歐國盃決賽周,每場比賽都係生死戰,尤其是首場比賽,落場球員難免心情較為緊張,稍有不慎輸波的話,出線機會就會大打折扣,相信意大利上半場唔會太過冒進,避免被對手偷襲,陷入困境。

土軍守將粒粒皆星

另一邊廂,土耳其近年於國際賽成績麻麻,喺上屆歐國盃決賽周止步於分組賽,傳統上土耳其都係靠「地獄主場」氣勢壓迫對手,作客水準往往大打折扣,佢哋近5次作客僅錄得1勝3和1負,今場去到意大利羅馬嘅奧林匹高球場比賽,恐怕難以喺「藍衫兵團」身上佔到甜頭。土耳其入波大部分來自前鋒布拉卡爾馬斯,不過面對意軍嘅鞏固防線,恐怕單天難保至尊;好彩土耳其防線人腳不俗,擁有效力李斯特城嘅後衞蘇恩古、利物浦中堅奧辛卡巴克,以及祖雲達斯中堅美列迪美羅,預計今仗上半場有力保持不失,半場和值博。