車路士傷鋒細盤嗒得諾
2021/10/23 00:00
文:法達斯維
今晚英超頭場，1哥車路士主場迎戰榜尾諾域治。兩軍排名雖差天共地，但車仔一對箭頭盧卡古同迪姆華拿齊齊因傷倦勤，諾域治客場出擊必定玩死守，2.5球入球細更值博。
（Now 621及611周六晚7時30分直播）
諾域治遇強必龜縮
榜首車路士近況略見回落，近3場聯賽錄2勝1負，其中贏修咸頓3比1之役係人多蝦人少，上輪險勝賓福特全靠門將艾度亞文迪屢救險球，否則3分難保。儘管周中歐聯大炒馬模4比0，但對手太弱唔作得準。今季回巢嘅箭頭盧卡古，各項賽事連續7仗食白果，仲喺對馬模嗰場波，同另一前鋒迪姆華拿齊齊傷出，今仗肯定缺陣，車仔攻力難免受影響。
「金絲雀」諾域治升班後表現差強人意，開咧8仗聯賽仍未贏過，入得兩粒咁大把，攻力之差曳絕英超。不過佢哋亦有自知之明，惟有先做好防守，單計近5場聯賽雖只得2和3負，但其中4場開2球或以下，包括近兩仗先後悶和般尼及白禮頓，今仗造訪車仔勢必龜縮，只求輸少當贏，2.5球入球細捧得過。