明恰魚腩拜仁半場大博得過
2022/10/04 00:00
文:邪神
歐聯C組第3輪賽事，拜仁慕尼黑主場迎戰柏辛域陀尼亞。經過兩輪賽事，C組形勢分明，拜仁擊敗同組兩支勁旅巴塞隆拿及國際米蘭，兩戰全勝排榜首，今仗對實力最弱、兩戰皆北嘅柏辛域陀尼亞，全取3分只是簡單任務，而且客隊近3仗歐聯全部半場落後，遇上拜仁肯定更「大鑊」，1.5球半場大博得過。（Now 643周三凌晨零時45分直播）
由於拜仁早前在德甲連場失分，主帥拿高斯文壓力沉重，好在上場對利華古遜大勝4比0強勢反彈，沙迪奧文尼重拾射門鞋，利萊辛尼、湯馬士梅拿同小將穆斯亞拿都有「士哥」，球隊壓力減輕不少，嚟到歐聯賽場自然要乘勝追擊，預計就算對手較弱，今仗仍會派強陣出擊，並希望及早領先穩住勝局，以該隊能力應做得到。
柏辛域陀尼亞實力差一截
捷克球隊柏辛域陀尼亞實力屬同組最弱，喺「死亡C組」注定任人魚肉，首仗作客巴塞大敗1比5，次仗主場對國米亦吞兩蛋，兩場都係上半場落後，今仗作客同組實力最強嘅拜仁，想唔輸都幾難，佢哋連同外圍賽，近3仗歐聯全部半場落後，相信今場亦唔例外，不過拜仁半場W熱到冇肉食，寧取1.5球嘅半場大好過。