日職煞科 冠軍誰屬今揭盅！
2022/11/05 00:00
文:邪神
日職今日煞科，榜首雙雄橫濱水手與川崎前鋒鬥足成季，終於嚟到最後一日分勝負，究竟係水手順利封王，還是前鋒奇迹逆轉？此外仲會決定亞冠附加賽名額，同埋降班誰屬，日職大局結今日上演！
一哥橫濱水手勢破勝利船
日職煞科焦點戰，橫濱水手係必然主角，呢支榜首球隊作客出擊，只要擊敗神戶勝利船，就可繼2019年後再奪聯賽冠軍，相信佢哋會把握機會，今仗到訪神戶務必全力避免任何錯漏，以全取3分為目標，加上對賽往績水手有明顯優勢，客勝必捧。
（有線662及602台周六下午1時直播）
安達臣盧比斯腳風轉順
目前橫濱水手喺聯賽領先川崎前鋒2分，得失球差比川崎前鋒多11球，所以水手今仗就算和波亦好大機會封王，但相信佢哋唔會冒險，目標係贏波捧盃。前鋒安達臣盧比斯上仗對浦和紅鑽，打破接近兩個月入球荒兼起孖，預期今仗繼續有表現，加上該隊對勝利船有明顯優勢，雙方近3次聯賽交鋒水手全勝，客勝值得支持。
神戶勝利船季初一度沉淪榜末，更曾經3度換帥，由洛天拿執掌教鞭後球隊才轉危為安，早前聯賽5連勝後護級成功。不過勝利船上仗被川崎前鋒終止連勝走勢，今仗相信亦難阻全力搶分嘅水手去路。
川崎前鋒後追盼大逆轉
衞冕日職嘅川崎前鋒煞科日作客ＦＣ東京，雖然尚有爭標機會，但形勢被動，因為只要同時開賽嘅橫濱水手贏波，川崎前鋒就算擊敗ＦＣ東京亦會衞冕失敗，因此今仗存在頗大變數，川崎前鋒只能盡力而為，觀乎佢哋近期頻頻演入球騷，2.5球大盤更值博。
（有線664及604台周六下午1時直播）
川崎前鋒近5年4奪日職，期間曾在2019年失冠，該年捧盃球隊正正就係橫濱水手，今季極可能歷史重演。雖然前鋒近期3連勝，但必須留意呢3場勝仗都係主場。事實上佢哋作客表現較差，近4仗作客只得2和2負，反映離開主場就靠唔住，亦因為作客失分太多，先會喺聯賽落後橫濱水手。不過整體而言，川崎前鋒攻力甚強，近4仗全開3球或以上，入球大仍然捧得過。
ＦＣ東京謝幕戰照攻
ＦＣ東京現居第6位，分數上已無緣爭奪第3名亞冠附加賽席位，今仗屬例行公事。佢哋近3仗主場獲得2勝，對上一仗主場更以4比0大炒同級嘅大阪櫻花，今仗主場謝幕戰，絕對唔會Hea踢令球迷失望，兩隊鬥攻隨時變入球騷。