想過捧盃癮傾力搶攻 岡薩多大盤手到拿來
2023/09/06 00:00
文:邪神
日聯盃8強首回合，北海道札幌岡薩多主場迎戰橫濱水手，兩隊於分組賽曾經交鋒，北海道札幌岡薩多主場以3比2擊敗對手，加上佢哋近3仗日聯盃全開4球或以上，今仗入球唔會少。橫濱水手忙於日職打衞冕戰，分神應付日聯盃相當吃力，雖然近期防線不穩，但攻力仲喺度，3.5球入球大係最佳選擇。（周三晚6時開賽）
岡薩多踢法大開大合，一攞波就全員進攻，所以佢哋嘅比賽經常開出大比數，近兩場日職就試過同川崎前鋒踢成2比2，上仗主場大炒大阪飛腳4比0；佢哋依家排聯賽中下游，暫時安全唔使護級，早前日皇盃又已出局，日聯盃成為佢哋捧盃希望，首回合主場出擊肯定想入多幾球。
橫濱水手防線穿窿
日職榜首目前爭持激烈，衞冕嘅橫濱水手正受到神戶勝利船同名古屋鯨魚等列強夾擊，少啲精神都唔得，佢哋早前喺日皇盃1比4大敗畀日乙嘅町田澤維亞出局，嚟到日聯盃隨時又走樣，而且水手近期聯賽成績下滑，包括1比4輸畀FC橫濱，上仗淨吞柏雷素爾兩蛋，兩仗失6球，今場再同有前冇後嘅岡薩多交手，唔愁冇波入。