阿爾巴尼亞籤運曳做炮灰
2024/06/08 00:00
阿爾巴尼亞繼2016年之後，第二次進身歐國盃決賽周，可以話係今屆賽事最弱球隊，更不幸係抽入「死亡之組」，面對如狼似虎嘅其餘3隊，出線機會可謂非常渺茫。不過阿爾巴尼亞有多位球員效力意甲球隊，該國足球風格亦師承意大利，擅長防守再伺機突擊，若然可以守和一兩場拎到分，已經叫有交代。
施雲奴領軍注入南美基因
50歲嘅施雲奴最為人所熟悉係球員時代曾效力阿仙奴、巴塞隆拿及曼城，呢位以助攻力強見稱嘅巴西著名左後衞，上年1月執教阿爾巴尼亞，並搵嚟前曼城右後衞薩巴列達擔任助教，幫球隊注入南美足球「基因」。施雲奴仲特登拎埋阿爾巴尼亞公民資格，似乎想拉近同球員嘅距離。