艾華斯堡搶韁半W好路
2025/05/26 00:00
文:法達斯維
今晚德附次回合，艾華斯堡返主場再鬥海登咸。乙組仔艾華斯堡首回合被逼和堅唔抵，但反映出戰鬥力唔曳，加上佢哋主場例搶韁，面對防守不穩嘅海登咸，有力先發制人，半場主勝有計。（周二凌晨2時30分開賽）
艾華斯堡雖然只係德乙第3，但首回合造訪德甲尾3嘅海登咸，完全冇怯場，更一度領先兩粒，只係下半場畀海登咸逼和2比2，痛失好局。事實上，呢支乙組仔主場戰績唔錯，17場聯賽主場獲9勝3和5負，近8次主場有6次喺上半場領先對手，踢法搶韁。
海登咸近況麻麻
上季異軍突起嘅海登咸，季後多名主力被挖角，加埋要兼顧歐洲賽，令呢支蚊型班兩頭唔到岸，歐協聯被淘汰，聯賽長期徘徊下游，最終尾3收場要打附加賽。查實佢哋近8仗只得2勝2和4負，其中4場冇波入，造訪主場勢盛嘅艾華斯堡，隨時半場都頂唔住。