作客勁敵先求穩守 英格蘭女足細鍊狂牛
2025/06/03 00:00
文:■ 邪神 ■
女子歐國聯A3組重頭戲，西班牙女足對英格蘭女足。今場為小組最後1輪，排榜首嘅西班牙女足只要唔輸即可首名出線，可以睇定嚟食，落後2分排次席嘅「女三獅」為爭出線非勝不可，但要擊敗「女狂牛」談何容易，佢哋作客偏向保守，加上雙方近5次交手，法定時間內全部開2球或以下，首選2.5球入球細。（周三凌晨1時開賽）
早前女子歐聯決賽，阿仙奴女足爆大冷以1比0擊敗巴塞隆拿女足捧盃，該仗阿仙奴女足靠死守穩住陣腳，再於下半場74分鐘由瑞典射手碧克絲甸紐絲施予致命一擊贏波，該仗送出助攻嘅，就係英格蘭女足前鋒美迪，幾位阿仙奴女足隊友，今場將會代表英格蘭女足火併擁有大半隊巴塞隆拿女足成員嘅西班牙女足，相信會用番阿仙奴女足相同策略，先玩死守，再靠突擊爭取贏波。
西班牙有戒心唔敢谷
西班牙女足於2023年女子世盃決賽，以1比0擊敗英格蘭女足奪冠，佢哋亦係上屆女子歐國聯冠軍，今屆繼續由27歲世界足球小姐兼女子金球獎得主邦瑪迪及主將卡丹堤領軍，分組賽5戰4勝1負強勢高踞榜首，唯一敗仗就係作客0比1敗於英格蘭女足腳下，對於「女三獅」嚴密防守肯定有戒心，今場再交手將格外小心，加上近年對賽不論勝負都入球偏少，今場入球細機會高。