又有球員攞紅牌
2020/12/18
阿仙奴踢少個逼和修咸頓
今季表現頹爆嘅阿仙奴又遭受打擊，喺周四凌晨英超主場僅以1比1逼和修咸頓，近6場聯賽都贏唔到，而且連續兩場有球員領紅牌被逐，咁搞法真係好難翻身。
開波18分鐘「兵工廠」即告失守，倒戈嘅修咸頓翼鋒禾確特接應查阿當斯直傳，單刀巧妙笠射入網。阿仙奴之後全力反擊，但都要等到52分鐘，先至由奧巴美揚射入扳平1比1，呢位31歲加蓬國腳終於打破648分鐘英超入球荒。
加比爾馬加希斯極速領紅
以為呢支英超傳統勁旅有轉機？咁又錯喇！中堅加比爾馬加希斯（紅衫）唔生性，喺58及62分鐘，極速連攞兩面黃牌結果被逐，繼上場對般尼，格列沙加被逐之後，阿仙奴連續兩場都有球員領紅牌打少1個。
值得一提，阿迪達自從2019年12月底執教「兵工廠」之後，佢哋已累積被罰7張紅牌，屬於英超同期之中最多嘅一隊。踢到92分鐘，阿仙奴原本有機會絕殺對手，可惜洛賀丁頭槌攻門中楣彈出，最終打和1比1，阿仙奴近6場英超只有2和4負，仍然排聯賽第15位，唔通今季真係要打護級戰？