單場失5粒意大利重現黑歷史
2022/06/16
意大利繼無緣今屆世盃決賽周之後，再受重大打擊，周三凌晨歐國聯A3組作客2比5慘敗於德國腳下，亦係意大利近74年，首次喺正式賽事單場失5球，呢支「藍衣兵團」重建之路相當難行。
雙方早前歐國聯首循環交鋒打和1比1，但今仗德國佔壓倒性優勢，開賽10分鐘就由甘美治射入打開紀錄。臨完上半場，意大利中堅巴斯東尼禁區內侵犯莊拿斯荷夫曼，被吹罰12碼，根度簡主射入網。
換邊之後，德國繼續強攻，湯馬士梅拿建功加上迪姆華拿梅開二度，戰至69分鐘已經領先5比0。意大利靠小將基諾圖門前執雞，加上巴斯東尼補時頭槌頂入，僅能追至2比5完場。
迪姆華拿起孖
意大利今仗防線穿窿，門將基安盧基當拿隆馬更出現低級誤傳，導致失第5球，賽後佢公開道歉：「我犯咗大錯，要負上責任，但會從錯誤中學習同成長，依家需要休息，將來要變得更強。」德國門將紐亞指球隊取得重大里程碑，主帥費歷克為迪姆華拿入兩球感到高興，認為有助提升呢位射手嘅信心。
意大利對上一次正式賽事單場失5球，已經係1948年奧運男足3比5不敵丹麥，相隔74年後重遇噩夢，對於傳統上以防守穩健見稱嘅意大利絕對係重大恥辱。