祖記失分爆衝突
2022/09/13
VAR破壞絕殺入波
周一凌晨意甲出現混亂，祖雲達斯主場對沙蘭力坦拿一仗，完場前爆發大規模衝突，「祖記」前鋒米利克嘅補時絕殺，被VAR誤判越位，連累呢支意甲勁旅由袋足3分變成僅得1分，雙方職、球員激烈爭執互相推撞，結果球證出示4張紅牌，呢場比賽最終以2比2完場。
近況低迷嘅祖雲達斯今場開波繼續夢遊，18分鐘就被客隊簡達華攻陷，完半場前再有基爾臣比爾馬犯規輸12碼，比亞迪克操刀為沙蘭力坦拿領先2比0。「祖記」下半場大反擊，51分鐘基爾臣比爾馬將功贖罪，頭槌頂入追成1比2接近紀錄，之後「祖記」繼續圍攻對手，直到補時上演球迷奇遇記。
米利克入球唔計兼被逐
祖雲達斯93分鐘博到12碼，邦路斯主射雖被救出，但佢反應快補中追成2比2。兩分鐘後「祖記」一度以為神奇反先，米利克接應角球頂入，佢開心到衝向場邊除衫慶祝，結果攞咗第2面黃牌被逐，但尷尬嘅係球證翻睇VAR之後，認為處於越位位置嘅邦路斯影響比賽，改判入球無效。其實VAR檢查期間，雙方職、球員已經出現激烈爭拗，並且互相推撞，球證事後向沙蘭力坦拿球員法斯奧、祖雲達斯中場古達度，以及「祖記」教練阿里基出示紅牌。
電視台賽後公開片段顯示，米利克頭槌入波一刻，客隊嘅簡達華喺角球旗附近已經包晒越位，數據指簡達華當時離底線2.9米，而米利克距離底線3.42米，足足有52cm嘅差距，懷疑VAR「睇漏人」。邦路斯賽後表示：「球證有冇見睇到簡達華嘅位置？就算球證睇唔到，我都冇任何動作影響比賽，唔應該被吹罰。」