「五金防線」頂到尾 激和烏拉圭南韓執1分
2022/11/25
尋晚世盃H組大戰，烏拉圭對南韓，「太極虎」雖擁有「面罩俠」孫興民，但呢位前鋒受到嚴密看管，埋門機會唔多，結果憑「五金防線」死頂，與烏拉圭激戰90分鐘後踢成0比0，總算有分落袋。
烏拉圭派出兩代利物浦射手蘇亞雷斯及達雲紐尼斯，加上曼聯小將法根度柏利斯查踢3箭頭，南韓則擺出「五金防線」，拿玻里中堅金玟哉領銜，門將及4位後衞同樣姓「金」，孫興民戴面罩擔任左中場。
黃義助門前失機
烏拉圭上半場有皇馬攻擊手費達歷高華維迪兩度埋門，但均無功而還，南韓憑「爆肺式」體力化踢法壓迫製造威脅，33分鐘一次攻勢，黃義助12碼點空晒勁射可惜炒波底高出，錯失黃金機會，完半場前高甸接應角球招牌頭槌勁頂中柱，半場互無紀錄。
下半場雙方埋身鏡頭頗多，孫興民與馬田卡沙利斯一次短兵相接被踢甩鞋倒地，呢位熱刺前鋒其後一次埋門又起唔到腳。賽事末段烏拉圭變招，由卡雲尼入替蘇亞雷斯，利用高空轟炸攻門，攻勢當堂更入肉，可惜無論達雲紐尼斯同費達歷高華維迪嘅禁區外冷箭，定係卡雲尼嘅頭槌都係搞唔掂，最終雙方保持0比0完場，各得1分。