大炒森林殺入英聯盃決賽 曼聯誓破6年冠軍荒
2023/02/03
曼聯捧盃仲差1步！尋日凌晨英聯盃4強次回合，曼聯主場以2比0再次擊敗諾定咸森林，兩回合合計大炒5比0殺入決賽，2月26日將會喺溫布萊球場同紐卡素爭奪冠軍。今次係曼聯歷來第10次殺入英聯盃決賽，球隊對上一次捧盃已經係2017年英聯盃同歐霸盃雙冠王，坦哈格打造嘅「新紅魔」有望終結6年冠軍荒。
辛祖回歸轉踢10號位
雖然首回合領先3球，曼聯今仗仍然派出卡斯米路、般奴費南迪斯等主力，上半場兩隊互有攻守，形勢持續膠着，其後曼聯換入拉舒福特、安東尼馬迪爾同查頓辛祖即收奇效，安東尼馬迪爾73分鐘補射入網，3分鐘後再由拉舒福特助攻費特近門射入，助曼聯贏2比0完場。賽後領隊坦哈格表示：「好開心殺入決賽，但係入決賽唔係重點，贏冠軍先係最重要，我哋會面對好強嘅對手（紐卡素），但呢一刻先要集中聯賽，專注之後嘅賽事。」
查頓辛祖早前因狀態差勁被坦哈格打入冷宮，不過尋日呢位英格蘭球星相隔102日後再披曼聯戰衣，喺奧脫福球迷不斷高唱佢個名打氣下，查頓辛祖以「10號」位置上陣表現突出，經常喺箭頭安東尼馬迪爾身後策動攻勢，曼聯嘅進攻更加到肉，坦哈格表示：「查頓辛祖復出係好事，球員最緊要係享受足球，球迷嘅反應亦畀佢力量同動力。查頓辛祖可以踢10號位同翼鋒，佢可以將呢兩個位置融合，呢點亦係我最鍾意佢嘅地方。」