大炒阿仙奴！封王在望 夏蘭特迪布尼 歐洲最強連線
2023/04/28
|
|
|
||||||||||||
曼城王者降臨！周四凌晨英超榜首大戰以一面倒姿態結束，曼城主場以4比1大炒阿仙奴，雖然仍以2分落後「兵工廠」，但踢少兩場嘅「藍月亮」已重奪爭冠主導權，最後7輪聯賽贏6場就足夠封王。曼城雙星艾寧夏蘭特同奇雲迪布尼今場大爆發，兩人合作摧毀阿仙奴後防，堪稱歐洲最強連線！
曼城一開波已經上力，7分鐘一次簡單反擊，艾寧夏蘭特中場控定後，彈畀後上嘅奇雲迪布尼長驅直進射入，曼城領先1比0；阿仙奴之後繼續捱打，上半場補時階段，史東斯接應奇雲迪布尼罰球頂成2比0。
已經控制戰局嘅曼城，喺下半場54分鐘再由艾寧夏蘭特妙傳奇雲迪布尼射入，鎖定今場關鍵勝仗。
打破英超單季最高入球紀錄
比賽最後階段已進入「垃圾時間」，86分鐘阿仙奴憑洛賀丁禁區內抽射破蛋，但係曼城仍未收夠籌，今場多次錯失機會嘅夏蘭特，喺補時5分鐘接應菲爾科頓妙傳射成4比1，呢球亦係佢今季英超第33球，打破英超38場時代嘅單季最高入球紀錄。
藍月亮捧盃機率逾9成
曼城依家落後阿仙奴2分但踢少兩場，爭冠形勢一片光明，預測曼城有92.06%機會捧盃，領隊哥迪奧拿賽後表示：「呢個係我想要嘅位置，主動權已經喺自己手上，嚟緊呢三仗非常重要，我哋只需要贏晒自己嘅比賽。」哥迪奧拿亦點名大讚夏蘭特同迪布尼呢個組合：「夏蘭特同迪布尼呢個組合極具威脅，當對手想壓逼我哋，佢哋就會喺後面嘅空位製造威脅。」