普巴翻生變祖記救星
2023/05/13
幾乎被球迷遺忘嘅法國球星保羅普巴，周五凌晨歐霸盃4強首回合終於翻生，最後關頭送出關鍵助攻成為球隊救星，協助祖雲達斯喺補時7分鐘1比1逼和西維爾，下周五次回合賽事會作客西班牙踢生死戰，爭奪歐霸盃決賽資格。
祖雲達斯今仗雖然主場出擊，但面對「歐霸之王」西維爾明顯被比下去，26分鐘西維爾一次快速反擊，奧甘波斯右路傳中，安尼斯利無人看管下輕鬆射入。祖記下半場變陣略有起色，70分鐘入場嘅保羅普巴表現活躍，比賽去到補時7分鐘，保羅普巴底線前頭槌傳中，由另一後備奇兵加迪喺龍門口頂入，追成1比1完場。
羅馬１比０小勝利華古遜
另邊廂，由摩連奴率領嘅羅馬喺主場出擊，以1比0擊敗由沙比阿朗素帶領嘅利華古遜，呢場師徒對決暫時由師傅先贏一仗。羅馬今場入波功臣係小將艾度亞度保夫，佢以20歲350日之齡成為羅馬史上歐洲賽4強最年輕入球者。
摩連奴首次同昔日皇馬愛將沙比阿朗素以主帥身份交鋒，賽前兩人互相擁抱。今仗兩隊勢均力敵，63分鐘出現唯一入球，近期喺羅馬彈起嘅艾度亞度保夫中路突破，交畀譚美阿巴謙射門被撲出，但艾度亞度保夫及時趕到補射入網，協助羅馬首回合贏1比0。
摩連奴賽後就話：「呢場勝仗嘅讚賞全部屬於球員，佢哋顯示出心理質素、決心同責任感去回報球迷，呢場比賽唔易踢，實際啲講係非常難踢，但球員交出好表現換取首回合勝利。」