麥湯米尼做英雄全靠碧咸！
2023/10/09
|
|
|
|
|
||||||||||||||||||||
補時入兩粒救曼聯
曼聯周六（7日）英超戲劇性2比1反勝賓福特，曼聯喺大部分時間落後劣勢下，麥湯米尼同哈利馬古利聯手炮製97分鐘絕殺，救番領隊坦哈格一命，諷刺嘅係呢2位功臣，正正係坦哈格喺夏天極力踢走嘅「滯銷貨」，估唔到最後變成自己「救命丹」。麥湯米尼賽後自爆睇碧咸嘅紀錄片，令佢得到今場爆發嘅靈感。
為悼念傳奇領隊費格遜妻子離世，曼聯球員臂纏黑紗作賽。雖然曼聯上半場有60%控球率，但攻勢欠直接，賓福特打突擊反而仲有威脅，26分鐘，曼聯中後場連串犯錯，先有卡斯米路被對方中場逼搶失波，域陀連迪路夫解圍又唔夠清脆，最慘係奧拿拿反應慢，被馬菲亞斯贊臣一記力度不大射門溜入，曼聯先落後0比1。
2:1奇迹反勝賓福特
曼聯上半場毫無起色，更因為賓福特另一次中場逼搶幾乎輸多粒，麥比奧莫熨射奧拿拿睇怕又救唔到，最後柱邊出界。下半場冇態嘅卡斯米路被換走，由基斯甸艾歷臣入替，攻咗一輪冇收穫，於是坦哈格收起拉舒福特同美臣蒙特，改派阿歷真度加拿祖同安東尼馬菲奧斯，最後階段安東尼馬迪爾都出嚟搏殺。去到87分鐘，麥湯米尼落場，93分鐘就建功追成1比1，戰至97分鐘，佢再接應哈利馬古尼頭槌二傳攻入絕殺，曼聯完成驚天逆轉，全取3分。
坦哈格承認曾想賣走麥湯
麥湯米尼賽後表示：「補時入2球實在太神奇，今場係我足球生涯最美好時刻之一。我5歲開始效力曼聯，呢間球會係我嘅一切，我尋晚睇緊碧咸套紀錄片得到激勵，費格遜經常都會睇手錶，今場再次證明，踢到最後1分鐘都可以爭取勝利。」
至於馬古尼今場表現亦非常稱職，佢同麥湯米尼都係夏天清洗名單之一，坦哈格賽後亦承認諗過賣走麥湯米尼：「所有球員都有個價錢，不過麥湯米尼好值錢，我想曼聯陣中每位球員，都似佢咁每1分鐘都會努力戰鬥。」