阿仙奴破魔咒砌低曼城 達Sir神調動首鍊贏師傅
2023/10/10
周日晚阿仙奴主場同曼城合演英超大戰，亦係兩軍主帥兼師徒阿迪達同哥迪奧拿嘅鬥法。最終阿仙奴憑加比爾馬天尼利尾段入波，以1比0小勝對手，終止近12場聯賽交鋒全敗劣績。「達Sir」神調動下喺聯賽首度鍊贏師傅，兼完成英超「通殺」偉業，可謂咩彩都攞晒。
今仗兩軍陣容同樣不整，阿仙奴翼鋒布卡約沙卡因傷缺陣，「藍月」亦有中場洛迪卡斯簡迪續坐波監。客軍初段仍然控制戰局，加華度爾近射被迪格蘭賴斯護空門，解圍不遠輪到尼敦阿基埋門高出。之後「兵工廠」門將大衞拉耶解圍，彈中祖利安艾華利斯幾乎入網，認真驚險，半場互交白卷。
馬天尼利幸運入球奠勝
阿迪達見勢色唔對，易邊後換入傷愈嘅加比爾馬天尼利，佢入場冇耐開角球，差啲造就加比爾馬加希斯頂入。兩隊爭持不下，「達Sir」再換入湯馬士柏迪、夏維斯同富安健洋，86分鐘柏迪長傳，富安健洋頭槌頂畀夏維斯，後者再彈交馬天尼利勁射，省到尼敦阿基入網，阿仙奴憑呢個幸運波全取3分，賽後同榜首熱刺同分，只因得球較少排次席。
「達Sir」接手阿仙奴後，之前7次聯賽對師傅哥迪奧拿全敗，今仗終於打破宿命，球隊亦終止連續12場聯賽對曼城輸波走勢，成功一吐烏氣。此外阿迪達上任不足4年，喺英超贏過晒24支唔同對手，實現「通殺」偉業，佢賽後勁得戚：「我原本換富安健洋入嚟應付謝利美杜古，但曼城之後將佢調去另一邊，我就叫富安壓前啲，老實講幾位後備都好出色，為球隊注入力量同質素。」