大破韋斯咸4強避埋車 利物浦抽靚籤衝冠
2023/12/22
英聯盃決賽等睇「紅藍大戰」！周四凌晨英聯盃壓軸戲，利物浦主場5比1大破韋斯咸，順利躋身4強。準決賽亦隨即進行抽籤，「紅軍」同富咸爭逐決賽席位，另一熱門車路士就會鬥英冠嘅米杜士堡，決賽有望上演「紅藍大戰」利物浦對車路士嘅重量級戲碼。
利物浦今仗將穆罕默德沙拿同阿歷山大阿諾特先放後備，不過藉晏菲路球場威力依然佔盡上風，半場由蘇保斯拉爾遠射建功領先1比0。換邊後「紅軍」大開殺戒，居迪斯鍾斯窄角度射成2比0，加普喺71分鐘再入一球；韋斯咸喺77分鐘憑查洛保雲破蛋，但利物浦喺最後階段再由穆罕默德沙拿同居迪斯鍾斯入波，湊成5比1大捷。
利物浦領隊高普賽後表示：「我哋今場表現好好，好多球員都有出色表現，比起上場悶和曼聯好好多，由第1秒開始我已經好享受。」展望4強大戰富咸，佢就話：「富咸係支好成熟嘅球隊，今季同佢哋交手已經見識過，佢哋都希望去溫布萊踢決賽，我哋仲有幾個星期好好準備。」
高普嫌晏菲路球迷「冇態」
然而，紅軍雖大勝而回，但高普就嫌主場球迷「好靜」，今場更轉身向住球迷攤手表達不滿。因此，高普希望嚟緊「聖誕大戰」對阿仙奴，Fans可以提升狀態，重拾晏菲路超強嘅氣勢︰「我對身後球迷嘅氣氛唔太開心……我哋喺輪換之下已經控制住韋斯咸，球迷嘅低沉係因為我哋上場冇大炒曼聯？嚟緊對阿仙奴，我希望球迷喺第1秒已經『撻着』。如果因為12月有太多比賽令佢哋狀態唔好，我建議請將波飛送畀其他人。」