柏度樸路轟世界波助熱刺晉級
2024/01/07
昨日凌晨英足盃第3圈「全英超對決」，熱刺憑右後衞柏度樸路「鐵樹開花」射入世界波，主場以1比0擊敗般尼，晉級第4圈。普斯迪高路今季擔任熱刺領隊以來，球隊首22場比賽都有波入，成為英超史上第2位創出此壯舉嘅主帥，僅次於前車路士領隊安察洛堤2009/2010年球季執教車路士所保持嘅28場紀錄。
熱刺雖然缺少離隊出戰亞洲盃嘅首席射手孫興民，但今仗仍然佔上風，上半場有67%控球率，7次射門3次中目標，但未能轉化成入波。戰至78分鐘出現精彩一幕，柏度樸路喺前場右路截到波之後，推到禁區邊，右腳「腳趾尾拉西」勁射入網，亦係呢位24歲西班牙國腳今季首次入波，熱刺最終憑呢球世界波晉級第4圈。
艾歷迪亞卡尼拜仁重聚
另外，拜仁冬季轉會窗將會再向熱刺出手，斟介後防老臣子艾歷迪亞，據報雙方已達成個人協議，熱刺亦唔會強留，只要搵到替代人選，就會放人。艾歷迪亞效力熱刺10個球季，由於今季長坐冷板，已決定轉投拜仁，仲可以同舊隊友哈利卡尼重聚。