車仔拆紐高爾彭馬做功臣
2024/03/13
昨日凌晨英超獨腳戲，車路士主場以3比2擊敗紐卡素，中場高爾彭馬成為主角，貢獻1次助攻及射入1球，呢位21歲中場今季英超已創造19球，包括射入11球及8次助攻，成為「車仔」史上單季創造最多入波嘅U21球員。
開賽6分鐘，車路士就打開紀錄，高爾彭馬遠射，尼高拉斯積遜加多一腳入網，紐卡素亦不甘不弱，上半場末段由阿歷山大伊沙克射入靚波扳平。換邊之後，彭馬遠射建功，助車路士再次領先，之後梅迪歷扭過門將再射入空門，將紀錄拉開至3比1。雖然積及梅菲喺臨完場為紐卡素追番1球，但為時已晚，慘吞英超作客2連敗。
3:2挫紐卡素肥普唔收貨
車路士近4場英超取得2勝2和，包括打和曼城，表現有起色，但領隊「肥普」普捷天奴唔滿意今場防線表現：「進攻球員愈來愈有信心，但對於兩球失波感到失望，因為兩次錯誤都唔應該出現。」