請８萬人飲啤酒！列奧斯完美告別
2024/05/20
多蒙特傳奇馬高列奧斯宣布季後離隊，前日德甲煞科係佢最後一次為「蜜蜂兵團」喺德國上陣，多蒙特著名嘅「黃牆」亦砌出列奧斯嘅11號作最後致敬。呢位德國球星喺告別戰交出1入波同1助攻，協助多蒙特4比0大勝達斯泰特，而且仲豪氣請晒8萬球迷飲啤酒，完美告別。
一射一傳領多蒙特大捷
已拎到歐聯資格嘅多蒙特，今場迎戰達斯泰特成為歡送馬高列奧斯嘅派對，佢30分鐘交助攻畀伊恩馬特臣先開紀錄，38分鐘再喺禁區頂射入靚罰球，帶領多蒙特最後贏4比0。多蒙特主場嘅經典「黃牆」砌出馬高列奧斯嘅11號，當佢82分鐘被調離場，更加全場起立鼓掌，答謝佢過去12年嘅貢獻。
多蒙特官方賽前貼出一張馬高列奧斯手寫字條：「多謝大家，告別啤酒我請客！」多蒙特今仗全場超過8萬球迷，都可以免費去拎啤酒飲，列奧斯表示：「我一早計劃好，一切都好完美，今場係我最後一次喺多蒙特主場比賽，我好感激大家畀我嘅愛，好開心再次感受『黃牆』嘅氣氛，我想回報大家。」