阿特蘭大首奪歐洲賽冠軍
2024/05/24
豪派3蛋破利華不敗身
周四凌晨歐霸盃決賽，意甲嘅阿特蘭大再現神奇球隊本色，憑盧卡文個人大演帽子戲法，3比0擊破德甲冠軍利華古遜今季不敗金身，更重要係打破61年錦標荒，兼拎到球會創會超過100年首個歐洲賽冠軍，表現贏盡掌聲。
今季51場不敗嘅利華賽前備受睇好，不過阿特蘭大更勝一籌，12分鐘由盧卡文入楔先開紀錄。阿特蘭大嘅壓迫令利華難以組織，26分鐘一次前場反搶，盧卡文變速推過格列沙加，禁區頂妙射遠柱入網。換邊後阿特蘭大用穩守突擊戰術，戰至75分鐘，再由盧卡文完成「帽子戲法」，大勝3比0捧盃。
等足61年再次捧盃
阿特蘭大今屆歐霸分組賽首名出線，淘汰賽先後踢走士砵亭、利物浦同馬賽，佢哋對上一次捧盃已經係1963年嘅意盃，等足61年先再嘗冠軍滋味，更係阿特蘭大創會116年以來，第1個歐洲賽事錦標，寫下歷史輝煌一頁。
教練加斯柏連尼表示：「我相信我哋已被寫入史冊，我哋捧盃嘅過程非常精彩，士砵亭係葡萄牙冠軍，贏利物浦嗰陣佢哋係英超榜首，利華古遜更加橫掃德甲，好多謝我嘅球員交出神奇表現，阿特蘭大好值得拎呢個冠軍。」
聯賽甩轆「助」意甲6隊踢歐聯
同時，隨住阿特蘭大奪得歐霸盃，意甲下季有機會歷史性派出6隊出戰歐聯，但前提係要阿特蘭大最後兩輪聯賽「甩轆」，唔好升上聯賽前4名。
意甲已透過歐洲賽系數排名拎到下季「歐聯第5席」，而阿特蘭大依家就係排第5名。根據歐洲足協規例，歐霸盃冠軍嘅地位比聯賽第5名高，阿特蘭大會以歐霸冠軍身份出戰歐聯，而本身嘅「第5席」獎勵名額，就會交畀第6位嘅羅馬。
不過關鍵係阿特蘭大必須排第5位，如果佢哋最後殺上第3或第4位，個獎勵名額會轉畀其他聯賽。阿特蘭大依家落後博洛尼亞（第3）同祖雲達斯（第4）2分，但踢少兩隊1場，阿特蘭大贏晒最後2場就一定會過頭，所以如果意甲想有6隊踢歐聯，就要望阿特蘭大輸波。