反先即拉布 意軍悶親fans
2024/06/17
衞冕歐國盃嘅意大利，周日凌晨喺B組第一擊對住阿爾巴尼亞，雖然23秒意軍就閃電失波，但畢竟實力更高，三扒兩撥就反敗為勝，加上下半場踢悶波一味傳傳傳，最終意大利贏2比1，敲響勝鼓。
開賽23秒遭阿爾巴尼亞破門
今場比賽早段即高潮迭起，阿爾巴尼亞開波23秒就製造驚喜，意大利左閘費達歷高迪馬高掟界外球送禮，掟入自己禁區被尼迪美巴拉美搶到，呢位效力薩斯索羅嘅中場窄角度狂抽網頂領先，而23秒入波亦創造歷史，成為歐國盃史上最快出現嘅入波。
意大利失守後極速重組，不斷用短傳製造機會，戰至11分鐘由中堅巴斯東尼頭槌扳平，5分鐘後再憑尼高路巴列拿禁區頂窩利抽入反超前，以2比1完半場。
當以為意大利下半場會乘勝進擊，點知竟大踢悶波，喺中場不斷傳球睇到球迷恰眼瞓，最終有4名球員傳球超過100次，包括佐真奴費路（120次）、迪羅倫素（114次）、巴斯東尼（110次）同尼高路巴列拿（105次），結果亦求仁得仁，保持2比1完場。