甩住腳箍照入瑞士激贏匈牙利
2024/06/17
至於上周六晚歐國盃頭場，A組嘅瑞士對匈牙利。今場兩隊鬥攻，戰況可觀，瑞士憑博洛尼亞中場艾比斯查1傳1射，完場前比列安保路甩住腳箍照入波，以3比1擊敗被視為「奇兵」嘅匈牙利。
開賽12分鐘，瑞士艾比斯查送出致命直線，基華奧杜亞門前輕鬆射入，瑞士領先1比0。完半場前艾比斯查禁區頂引球推順放冷箭直飛死角入網，瑞士領先2比0返入更衣室。
匈軍「肥壯巨人」嚇親球迷
下半場匈牙利全力反撲，喺66分鐘由班拿巴斯華加扳回一城。補時期間匈牙利空群而出，瑞士一次簡單攻勢搞掂，門將恩尼森馬龍門球送前，匈牙利中堅韋利柯賓解唔到圍，比列安保路突破防線單刀，甩住腳箍埋門射成3比1奠勝。今屆被視為「奇兵」嘅匈牙利其實都搏到盡，更派出「秘密武器」馬田阿當上陣搏殺，令全世界球迷為之震驚，因為呢位身高1米91嘅29歲射手體形龐大，似巨形版「肥哨」朗拿度，估計體重超過200磅。
由於佢睇落唔似足球員，賽後即被網民起底，原來佢效力蔚山HD，為呢支韓職球隊披甲3季總共上陣54場入17球及8次助攻。然而，馬田阿當上陣後表現一般，踢咗11分鐘9次觸球有4次失球控球權，5次傳波有3次成功交畀隊友，並未發揮「秘密武器」作用。