干斯卡奧做英雄延續家族榮耀
2024/06/20
|
|
|
||||||||||||
落場111秒即助葡萄牙反勝
尋日凌晨歐國盃F組賽事，奪標熱門之一嘅葡萄牙大戰捷克，C朗拿度強勢登場，呢位39歲球星紀錄性第6次出戰歐國盃，成為歷史第1人。葡萄牙先失1球下，憑法蘭斯高干斯卡奧補時絕殺，神奇反勝2比1。
葡萄牙今仗由紀錄性第6次出戰歐國盃嘅C朗掛帥，順利主導比賽圍攻捷克，可惜拉爾菲利亞奧、C朗及域天拿連番攻門都未能成功，半場兩隊踢成0比0平手。
下半場葡萄牙繼續施壓，55分鐘魯賓戴亞斯右路急勁傳中，C朗近門頭槌被閂走。戰至62分鐘捷克第1次射門就由盧卡斯普禾特禁區頂妙射領先。葡萄牙69分鐘幸運追平，捷克門將史坦尼克拍波落隊友羅賓夏蘭歷隻腳反彈入網擺烏龍。葡萄牙87分鐘入波被判越位在先，去到補時2分鐘出現致勝入球，柏度尼圖左路傳中，捷克後防解圍犯錯，被法蘭斯高干斯卡奧門前射入，葡萄牙得以神奇反勝。
第2對決賽周入波父子兵
波圖翼鋒干斯卡奧成為國家英雄，佢喺90分鐘後備入替，結果只係落場111秒就攻入絕殺，成為自2016年歐國盃決賽嘅艾達盧比斯後，首個喺歐國盃後備入波嘅葡萄牙球員，而佢爸爸沙治奧干斯卡奧，更加係葡萄牙「黃金一代」名將。
爸爸24年前對德國戴帽
現年49歲嘅沙治奧干斯卡奧，同費高、雷哥斯達等傳奇係同一世代，曾56次代表葡萄牙國家隊，代表作就係2000年歐國盃分組賽，對德國連中三元幫葡萄牙贏3比0。干斯卡奧今場延續爸爸光榮，成為繼意大利嘅基艾沙父子之後，歷來第2對喺歐國盃決賽周入過波嘅父子兵。
法蘭斯高干斯卡奧喺波圖上位，正正係做波圖教練嘅爸爸一手提拔，呢位21歲翼鋒賽後表示：「我依家無比幸福，代表國家隊為全國而戰，入波一刻真係超級自豪，我想為葡萄牙人帶來快樂，特別係我屋企人，呢個入波係獻畀佢哋。」