拿帥激吻女友賀續約
2024/06/21
贏埋匈牙利德國鎖定16強
周四凌晨歐國盃A組次輪賽事，東道主德國憑隊長根度簡入波兼助攻，以2比0輕取匈牙利，兩戰全勝狂轟7球，提前鎖定16強資格，連續5屆歐國盃進身淘汰賽。同時，德國出線亦達成今屆「最低消費」，德國足總證實領隊拿高斯文嘅續約條款生效，最少教埋2026年世盃，難怪拿帥咁高興，一完場就走上觀眾席同女友激吻啦！
德國沿用番揭幕戰大勝蘇格蘭5比1嘅正選11人，包括前線嘅穆斯亞拿、科利安華迪斯同夏維斯。不過，今場嘅「主角」就係隊長根度簡。22分鐘，呢位巴塞隆拿中場殺入禁區再妙傳空晒嘅穆斯亞拿近射破網，為德國領先1比0。匈牙利之後作出反撲，完半場路蘭沙拉爾接應罰球近頂破網，可惜有隊友越位在先食鋪詐胡，虛驚一場，德國半場拎住1球返入更衣室。
達成「最低消費」教到2026世盃
易邊後德國繼續狂攻，拿高斯文其後撳掣換入富克洛同利萊辛尼加強攻力，喺67分鐘終有成效，米圖斯達特橫傳，「主角」根度簡第一時間快射得手，最終德國輕取匈牙利2比0，兩戰全勝轟7粒，強勢提早鎖定16強資格。
其實早喺4月份，德國足總已宣布同拿高斯文續約兩年，不過當中有個附帶條款，係德國必須要喺歐國盃分組賽出線，隨住球隊擊敗匈牙利，達成呢項「最低消費」，拿帥嘅新合約亦正式落實。呢位36歲少帥賽後表示：「我哋目標係3分，亦順利拎到，每個球員都願意付出，呢個係好好嘅徵兆，我好滿意。」
今次係德國自2012年後首次喺歐國盃開局2連勝，亦係球隊史上第5次，之前4次德國有3次最終拎到冠軍（1972年、1980年、1996年），似乎係冠軍好兆頭。難怪拿高斯文賽後勁興奮衝上看台，等全世界睇住佢同女友Lena激吻慶祝啦。