次輪悶和荷蘭好冇面 麥巴比齋坐法國死晒火
2024/06/23
|
|
|
|
||||||||||||||||
法國陣容星光熠熠，不過上周六凌晨歐國盃對荷蘭，喺「球王」基利安麥巴比缺陣下慘成「冇牙老虎」，以0比0悶和，再次證明佢哋嘅「麥巴比依賴症」相當嚴重！據統計喺呢位球王冇踢正選情況下，法國近7場比賽只有5和2負成績。如果法國想以小組首兩名「堂堂正正」出線，麥巴比相信係箇中關鍵。
基利安麥巴比因首戰鼻樑受傷，今仗只列後備，不過法、荷兩隊早段踢得非常開放，互相駁火下製造多次埋門，可惜都係差少少，加上基沙文多次失機，雙方半場互無紀錄。換邊後法國逐步主導戰局，但基沙文繼續敗家，離門幾碼都射唔入。去到69分鐘，荷蘭僅有攻勢，沙維西蒙斯遠射破網，但球證認為處於越位嘅杜費斯影響比賽，結果判詐胡。法國尾段再谷一段但無力入波，最終兩隊各得1分。
雖然法國不乏球星，但麥巴比嘅重要性絕對高一個層次。呢場係佢自2018世盃開始首次喺國際大賽缺陣，期間19場世盃同歐國盃都有份落場，包括17次正選兼2次後備上陣，連埋今場在內，麥巴比3次國際大賽冇喺正選出現，法國成績係2和1負兼零入球，計晒所有麥巴比冇擔正嘅比賽，法國近7場只得5和2負。
迪甘斯︰門前效率令人失望
法國領隊迪甘斯賽後表示：「好不幸今場冇波入，呢場比賽好緊湊，雖然門前嘅效率差勁令人失望，但我對球員努力感到開心。今場進攻上都有好多正面信號，不過要贏波就一定要入波，我哋會返去檢討同作出改善。」
踢完D組次輪後，法國同荷蘭依家同樣2戰得4分，第3位嘅奧地利亦有3分在手，法國尾輪有乜差池隨時要跌落第3位，即使出到線都要顏面掃地。好消息嘅係，麥巴比今場喺場邊非常肉緊，開波前亦曾戴住面罩落場同隊友練習，應可趕及復出，似乎最後一輪對波蘭就係佢上演「救國好戲」之時！