格魯吉亞爆冷Ｗ闖16強
2024/06/28
創歷史！兩蛋贈葡萄牙
於歐國盃F組提早獲首名出線嘅葡萄牙，周四凌晨於分組賽最後一仗派副選應戰，結果小將安東尼奧施華兩次「送禮」，包括開波唔夠2分鐘回傳失誤，被格魯吉亞迅速攻破防線。加上喺下半場又因犯規，連累球隊輸12碼，葡葡牙終以0比2落敗。格魯吉亞爆出8.25倍冷Ｗ之餘，更創造歷史，首次參加國際大賽（世界盃及歐國盃）就晉級淘汰賽。
賽前兩隊處境其實有天壤之別，格魯吉亞只有1分，為出線非勝不可，反觀葡萄牙鎖定首名出線之下，領隊馬天尼斯對正選陣容作出多個輪換，包括收起般奴費南迪斯、貝拿度施華、比比等主力，並派出20歲小將安東尼奧施華擔任正選中堅。不過，呢位新星可能怯場，開賽唔夠2分鐘就回傳失誤，遭格魯吉亞前鋒米卡達捷截到個波，再快腳傳畀效力拿玻里嘅翼鋒基華拉斯基利亞射入，迅速打開紀錄。
葡國小將騰雞連環送禮
葡萄牙落後之下，創造唔少攻門，包括C朗勁射罰球被格魯吉亞門將馬馬達舒維利擋出，另一位前鋒祖奧菲歷斯、中場祖奧包連夏亦連番起腳，惜未能為葡萄牙半場扳平。
換邊之後，葡萄牙立即調入魯賓尼維斯加強攻力，一次角球攻勢，C朗起腳省中對手高出。格魯吉亞反擊亦有威脅，基華拉斯基利亞禁區內起腳，但欠力度同角度，被門將迪奧高哥斯達接實。戰至53分鐘，葡萄牙「防線炸彈」安東尼奧施華又出事，佢喺禁區內踢跌對手盧卡洛祖舒維利，球證睇完VAR後判罰12碼，米卡達捷主射入網，為格魯吉亞領先至2比0，呢位入球功臣更以3球升上射手榜首位。
去到65分鐘，葡萄牙將C朗及「罪人」安東尼奧施華換走，但就算換入干卡路拉莫斯、尼爾遜施美度仍未能扭轉敗局，格魯吉亞維持贏2比0，取得球隊史上首場歐國盃勝仗，3戰有4分以其中一支小組最佳第3名進身16強，將會對西班牙。格魯吉亞連葡萄牙都擊敗，士氣正盛，下場將另一隻「牙」淘汰都唔出奇呀！