加時克敵三獅驚險晉級比寧咸補時英雄
2024/07/02
尋日凌晨歐國盃16強，英格蘭先失一球，一度陷入出局邊緣，結果憑祖迪比寧咸補時入波追和，加時再由哈利卡尼頭槌破網，反勝斯洛伐克2比1，晉級8強硬撼瑞士。比寧咸過去一年6次喺補時入波，全部都係幫球隊絕殺或追平嘅「黃金入球」，堪稱「補時英雄」！
英格蘭講牌面星味贏晒，點知斯洛伐克一開波就嚟料，大衞漢斯高左路起腳僅貼柱出界，之後夏拉斯連攻門，捷比亞危急下護空門，但「三獅」頂唔到幾耐，25分鐘艾雲舒蘭斯近門先開紀錄，落後嘅英格蘭谷極唔起，半場落後一粒。
年內第6次90+入波
下半場開波4分鐘，菲爾科頓近門射入，惟越位在先食詐胡，轉頭基爾獲加同史東斯發夢，大衞史達歷趁機半場笠射，好在唔中目標。77分鐘英格蘭獲扳平機會，哈利卡尼近門頭槌攻門，點知唔中框，3分鐘後迪格蘭賴斯又射中柱，諗住氣數已盡，補時5分鐘奇迹出現，比寧咸人群中施展倒掛，為英格蘭扳平1比1，亦將比賽帶入加時。加時冇耐英格蘭一輪急攻，卡尼近門頂成2比1，「三獅兵團」力守勝果至完場，晉級8強。
今場英格蘭落後下攻極唔入，最後一個界外球攻勢，比寧咸福至心靈施展靚倒掛射入，救番球隊一命。連同呢球比寧咸一年內6度喺90分鐘後入波，佢賽後好激動：「呢個就係我嘅時刻！當時仲有30秒就要返屋企，出局會令國民失望，但一腳波就扭轉到局面。呢球係我生涯中最重要嘅入波之一。」由2004年開始，英格蘭喺歐國盃4次先落後，全部都能夠反敗為勝，領隊修夫基相當牙擦：「我一直覺得我哋唔會出局，有人會挺身而出入波，只係冇諗過咁精彩。」