德國加時遭西班牙絕殺 卻奧斯最後一舞變茅王
2024/07/07
尋日另一場歐國盃8強矚目大戰，德國加時遭西班牙絕殺，結束歐國盃之旅，令早已宣布歐國盃後掛靴嘅中場卻奧斯，足球生涯最後一戰遺憾收場。呢位踢法瀟灑嘅傳球大師，今場竟然變身「茅王」，踢傷柏迪之餘又曾踩踏拉明耶馬，最後只拎1張黃牌真係執到，西班牙領隊富安迪亦直指卻奧斯理應被逐。
上半場雙方互無紀錄，易邊後丹尼爾奧莫為西班牙先開紀錄，89分鐘科利安華迪斯為德國末段扳平，但加時尾段米基爾馬連奴頭槌頂入，西班牙贏2比1殺入4強，德國出局。
至於34歲嘅卻奧斯喺皇家馬德里用歐聯冠軍告別，可惜喺德國隊未能以捧盃做退休禮物，完場後一臉落寞。呢位德國中場今場踢法突然變得粗野，開波早段就踢傷柏迪，之後亦曾踩落拉明耶馬腳面，但呢兩腳連黃牌都冇，直到下半場先因技術犯規被罰黃牌，西班牙領隊富安迪賽後表示：「卻奧斯對柏迪嘅犯規應該係紅牌。」
梅拿歐國盃18場捧蛋
而另一位34歲老將湯馬士梅拿亦好大機會最後一次參加呢項大賽，呢位拜仁慕尼黑進攻中場曾於世盃累積入10球，但原來踢歐國盃卻一直啞火，總共上陣18次仍然食白果，成為球員生涯一大遺憾。