曼城2:2逼和10人阿仙奴 奧利華亂吹得罪晒兩隊
2024/09/24
|
|
|
||||||||||||
昨晨英超重量級大戰，衞冕嘅曼城迎戰爭標勁敵阿仙奴，阿仙奴領先2比1後，完半場前有李安度杜沙特爭議性被逐，曼城下半場瘋狂圍攻，最終去到補時8分鐘，由史東斯門前混戰追平2比2，力保接近2年嘅主場不敗身。今場主角又係球證奧利華，佢先喺上半場「Fake」基爾獲加令阿仙奴偷襲得手；之後再以「阻開波」為由趕杜沙特出場，引發爭議、得罪晒兩隊！
上半場9分鐘，沙維奧交靚直線畀艾寧夏蘭特射入，曼城先開紀錄。22分鐘，阿仙奴快開罰球，加比爾馬天尼利交畀首次擔正嘅卡拉科利轟入世界波扳平；加比爾馬加希斯再喺補時接應角球頂入，為阿仙奴反超前2比1。臨完半場前出現關鍵一幕，杜沙特被指喺吹罰後「多腳」踢波拎第2面黃牌，10人應戰嘅阿仙奴全軍退守，下半場變成英超史上最誇攻防戰，有89%控球率嘅曼城面對銅牆鐵壁，28次攻門合共只有1.04球xG（預期入球），最終喺補時第8分鐘，由後備上陣嘅史東斯於龍門口混戰抽入，驚險逼和2比2。
累獲加失位趕杜沙特離場
呢場極具爭議嘅激戰，球證奧利華再次成為主角，杜沙特喺34分鐘拎第1面黃牌，去到上半場補時佢撞開貝拿度施華，奧利華隨即吹罰，同時杜沙特大腳踢前諗住打反擊，結果被奧利華認為係故意踢走個波，出示第2面黃牌趕出場。不過由奧利華吹罰到杜沙特大腳踢波，中間相隔唔夠1秒，甚至連奧利華嘅「雞聲」都未完，根本唔似故意。
達Sir哥帥賽後齊插球證
阿迪達賽後表示：「有踢過波或者參加過運動嘅人會明白，杜沙特踢波同球證鳴笛相差唔夠1秒，係唔夠1秒！之前謝利美杜古停頓晒之後踢開個波都冇事，就係咁。」統計顯示，奧利華歷來趕過7個阿仙奴球員出場，係佢執法生涯出過最多紅牌嘅球隊。
投訴嘅唔止阿仙奴，曼城領隊哥迪奧拿同樣不滿，阿仙奴第1個入波嚟自後場快開罰球，當時奧利華曾經召喚雙方隊長（基爾獲加、布卡約沙卡）「訓話」，結果右閘基爾獲加失位成為缺口，哥帥表示：「我原本好嬲基爾獲加，但佢其實冇問題，因為球證叫咗佢同另一個人去講嘢，下次再有呢個情況，我哋唔會去同球證對話。」