迪基亞兩救12碼證身價
2024/10/08
昨日凌晨意甲，前曼聯鋼門迪基亞有神勇表現，撲出2球12碼，協助費倫天拿主場以2比1擊敗AC米蘭，呢位33歲西班牙球星已經逐漸重拾勇態，證明自己仍然係世界首屈一指門將。
費倫2:1挫A米
費倫天拿喺比賽初段攻勢較多，35分鐘中場耶仙艾里勁射入網打開紀錄。戰至上半場末段AC米蘭獲得12碼，迪奧靴南迪斯主射，被迪基亞捉到路撲出底線。換邊後，摩斯堅恩踢跌對手馬迪奧加比亞，連累費倫再次被判罰12碼。A米今次改由譚美阿巴謙主射，迪基亞又捉到路撲出，成為近8年以來，首位單場意甲救出2球12碼嘅門將。踢到60分鐘，A米憑基斯甸普列錫凌空射入扳平1比1。
迪基亞唔只把關技術出眾，進攻亦有貢獻，費倫天拿所入致勝1球，佢都有好大功勞，當時迪基亞大腳開出罰球，摩斯堅恩控波甩腳，反而造就艾拔古蒙臣射成2比1。