補時起孖助富咸反勝 威爾遜怪腳轟靚波
2024/11/06
尋日英超獨腳戲，富咸主場憑「後備殺手」哈利威爾遜補時連入兩粒，戲劇性2比1反勝賓福特。哈利威爾遜追平嘅一球，仲係跳起凌空用腳外檔怪腳射入，難怪賓福特領隊法蘭克都話「射100次得1次會入」！
賓福特領隊：射100次得1次會入
富咸主場出擊佔盡優勢，全場錄得26次攻門。24分鐘真拿達遠射入靚波為賓福特領先，富咸之後狂攻，但遲遲未能扳平，82分鐘威爾斯前鋒哈利威爾遜入替成轉捩點，佢先喺補時2分鐘近柱接應傳中用「怪腳」挑入遠柱，去到補時7分鐘更頭槌「絕殺」，助富咸反敗為勝。
賓福特領隊法蘭克賽後勁無奈：「今場差距好細，富咸係值得贏，但當你作客去到尾仲領先1比0，防守亦值得一讚。富咸最後瘋狂進攻，哈利威爾遜追和嗰個入波嘅角度，畀你射100球只會有1個係入波。」