雲爺爺有料到羅馬主場6連勝
2025/01/19
尋日凌晨意甲，羅馬主場3比1擊敗熱拿亞。雲尼亞里上年11月接手「首都狼」後，主場豪取6連勝，不過「雲爺爺」重申教埋今季就走。
羅馬開賽初段明顯佔優，包括保羅戴巴拿主射罰球中楣，25分鐘多夫碧門前補射破網，羅馬打破缺口，熱拿亞之後一次角球攻勢，由柏迪斯奧馬仙尼扳平完半場。換邊後羅馬控制戰局，60分鐘艾沙拉維射成2比1，加上熱亞拿門將利亞尼擺烏龍，羅馬完場贏3比1，各項賽事主場6連勝，亦係自2023年11月後，首次聯賽主場4連勝。
堅持教埋今季離隊
羅馬表現全面復甦，會方自然想挽留雲尼亞里，可惜呢位73歲老帥堅持教埋今季就離隊，羅馬到時又要搵過合適人選，肯定頭痛。