5:4奇迹反勝賓菲加 巴塞提早殺入16強
2025/01/23
歐聯於周三凌晨戰火重燃，立即出現驚天賽果，西甲豪門巴塞隆拿大部分時間落後之下，踢到比賽末段連入3球，作客以5比4反勝葡超球隊賓菲加，同榜首利物浦攜手提早1輪晉級16強。
柏夫利迪斯戴帽史上第3快
賓菲加今仗踢法非常進取，開賽未夠2分鐘就由前鋒柏夫利迪斯射入打開紀錄，巴塞隆拿立即反擊，左閘阿歷斯巴迪博到12碼，羅拔利雲度夫斯基主射入網為巴塞扳平。
之後巴塞門將施捷斯尼連番犯錯，先係出迎同隊友相撞，被柏夫利迪斯射入空門，跟住撲跌對手艾度路高奴，被判罰12碼，柏夫利迪斯主射入網，協助賓菲加上半場領先3比1。呢位26歲希臘國腳踢到30分鐘已完成「帽子戲法」，成為歐聯史上第3快「戴帽」球員，亦係1992/93年球季歐聯改制後，第4位對巴塞隆拿「戴帽」嘅球員，另外3位分別係艾斯派拿、舒夫真高、基利安麥巴比，柏夫利迪斯現時同3位神鋒睇齊。
換邊後，輪到賓菲加門將杜賓「送禮」，大腳解圍省中巴塞前鋒拉芬夏比洛尼入網。不過，巴塞防線又唔生性，中堅朗奴阿拿奧祖68分鐘擺烏龍，連累球隊落後2比4。幸好巴塞憑「羅拔佬」及艾利加西亞先後建功，追至3比3平手。喺補時6分鐘，拉芬夏比洛尼為巴塞射入反勝1球，贏5比4創出26倍「客其他（主有入球）」波膽，亦係歐聯史上第11次出現單場總入球達9球或以上。巴塞今屆歐聯7戰取得6勝1負，排第2位，提早1輪取得16強淘汰賽席位。
熱刺欲借安素法迪
至於今季返回巴塞繼續坐冷板嘅安素法迪，成為熱刺冬窗增兵目標。呢支倫敦勁旅希望以先借後買方式借用呢位22歲小將，巴塞已表態願意放人，現時要睇安素法迪本人意願。