殺入16強！皇馬再下一城 麥巴比戴帽睇齊3大傳奇
2025/02/21
|
|
|
||||||||||||
歐聯16強出爐！尋日凌晨附加賽次回合，皇家馬德里主場3比1再挫曼城，兩回合合計贏6比3晉級。法國前鋒基利安麥巴比今場連中三元，同C朗拿度、朗拿度等傳奇睇齊，更令曼城領隊哥迪奧拿執教生涯首次無緣歐聯16強，哥帥賽後亦承認曼城步入「時代終結」。
首回合落後2比3嘅曼城，今場有艾寧夏蘭特受傷先任後備，結果比賽成為麥巴比個人表演。4分鐘麥巴比接應長傳，禁區頂乖巧笠入；33分鐘皇馬美妙組織，麥巴比人叢中扣過飛剷嘅加華度爾，淡定射成2比0。換邊後61分鐘，麥巴比無人緊迫下輕鬆再入多球；曼城去到補時先由尼高干沙利斯破蛋，最終皇馬主場以3比1擊敗曼城。
麥總想對馬體會多過利華
「麥總」麥巴比踢出加盟皇馬後嘅代表作，亦係繼「大哨」朗拿度、C朗同賓施馬之後，第4個為皇馬喺歐聯淘汰賽入3球嘅球員。皇馬晉級後，16強將會面對利華古遜或馬德里體育會，麥巴比賽後話有心水：「兩隊都好難打，但我想對馬體會多啲，因為唔使舟車勞頓！16強一定難踢，所以唔使飛更加好。」
哥帥承認曼城王朝終結
曼城悲情出局，係哥迪奧拿自08/09球季首次帶隊踢歐聯以來，第一次無緣16強，佢賽後被問到曼城王朝係咪已經終結，哥迪奧拿亦承認：「有少少，冇錯。依家已經開始，冇嘢係可以永遠維持到。過去7年我哋贏過6次英超冠軍，喺歐聯方面亦至少都入到8強，我哋依家要專注聯賽，努力爭入前4。」