麥巴比專注歐聯鬥阿仙奴
2025/04/15
本土賽面臨重罰
周日（13日）晚西甲，皇家馬德里作客以1比0擊敗艾拉維斯，但付出沉重代價，前鋒基利安麥巴比使出「收山腳」踩對手，被球證出示紅牌趕出場，由於呢位法國球星犯規動作極其惡劣，面臨被罰停賽4場，可能無緣西班牙盃決賽對巴塞隆拿。相信嚟緊嘅歐聯8強次回合鬥阿仙奴，麥巴比會踢得更加落力，務求為皇馬反敗為勝。
皇馬鬥艾拉維斯一仗，踢到33分鐘由卡馬雲加先開紀錄，但5分鐘後，基利安麥巴比想阻止對手打反擊，一腳踩向艾拉維斯中場安東尼奧白蘭高，球證睇完VAR後，向佢直接出示紅牌。下半場艾拉維斯亦有後衞文奴山齊士侵犯雲尼斯奧斯祖利亞，同樣被趕出場，最終皇馬保持1比0勝果，落後榜首巴塞隆拿4分。
時隔6年再做紅牌阿姑
基利安麥巴比對上1次被逐，已經係2019年法足盃決賽，相隔6年再拎紅牌有手尾跟，根據西班牙《阿斯報》爆料，由於麥巴比涉嫌故意踩人，性質非常惡劣，估計會被罰本土賽事停賽4場，意味會缺席未來3場對畢爾包、基達菲及切爾達嘅西甲賽事，以及4月27日凌晨大戰巴塞隆拿嘅西班牙盃決賽。另有消息指麥巴比已作出道歉，加上以往行為良好，未必會坐4場「波監」。麥巴比仍然可以出戰周四凌晨歐聯8強次回合主場對阿仙奴，「銀河艦隊」首回合輸0比3，想翻身並唔容易。