曼城前5勁穩煞科日咬花生
2025/05/22
主場謝幕騷3:1破茅
尋日凌晨英超，曼城主場以3比1擊敗般尼茅夫，成功升上聯賽第3位，周日煞科戰只要拎多1分，就幾乎確保前5位置，下季歐聯入場券差唔多到手。反觀第4到第7位嘅紐卡素、車路士、阿士東維拉同諾定咸森林，4隊只差1分，邊兩隊無緣下屆歐聯要踢埋Last一輪先知！
曼城今季主場謝幕戰，14分鐘馬莫殊離門30碼「暴力射門」直轟死角，「般茅」不甘示弱，32分鐘反擊，法蘭斯高艾雲尼臣射中門柱。大難不死嘅曼城4分鐘後轟多粒，貝拿度施華接應根度簡妙傳近門抽入，領先2比0返更衣室。
換邊後兩隊繼續駁火，曼城中場高華錫67分鐘拉跌單刀嘅艾雲尼臣被逐，但客隊人數優勢只維持6分鐘，路易斯曲克亦因粗野飛剷食紅牌。雙方10人應戰下，尼高干沙利斯89分鐘為曼城射成3比0，「般茅」補時階段由丹尼爾捷比臣破蛋，曼城最終贏3比1，搶到保前5重要3分。
4至7位1分上落定生死
曼城依家有68分，領先第4至6位球隊2分，加上得失球有極大優勢，煞科戰作客富咸只要和波，亦極有可能保住前5位置。領隊哥迪奧拿賽後話：「上場對修咸頓失分係不幸，依家已差唔多完成任務，煞科日對手富咸都唔易食，但我哋會出席下屆歐聯。」
曼城形勢大好，第4至7位就有排鬥，紐卡素、車仔及維拉同樣有66分，森林65分形勢最曳，而煞科戰森林主場大戰車路士，勝負直接影響爭5形勢，另外紐卡素主場鬥愛華頓，維拉就會作客曼聯，同樣睇頭十足。