施洛 (左)、希汀加 (右)
「轉會權威」記者羅曼諾爆料，英超冠軍利物浦助教希汀加正同阿積士商討加盟事宜，如果成事，呢位41歲荷蘭名宿將會離開「紅軍」，意味主帥施洛損失好拍檔。
阿積士今季「臨尾香」失落聯賽錦標，教練費利奧利黯然離隊，會方力邀希汀加回巢執教。呢位荷蘭名將上年5月離開韋斯咸教練團，加盟利物浦擔任助教，今年2月底英超，施洛停賽之下，希汀加首次擔大旗領軍，以2比0擊敗紐卡素，教波能力受到肯定，難怪阿積士想搵佢接手。
