英格蘭歷史性負非洲兵 杜曹首失威獲加出醜玩完
2025/06/12
以挑戰明年世盃冠軍為目標嘅英格蘭，尋日凌晨熱身賽主場1比3輸畀塞內加爾，唔單止係德國領隊杜曹領軍後第一敗，亦係英格蘭史上首度輸畀非洲球隊。35歲嘅基爾獲加今場「災難級」表現飽受外界炮轟，國際賽生涯睇嚟玩完。
英格蘭上場世盃外1比0僅勝「魚腩」安道爾，杜曹嘅排陣戰術已經受到質疑，今場熱身賽對住塞內加爾，7分鐘就由哈利卡尼先開紀錄，但「三獅兵團」領先後漫不經心，40分鐘塞內加爾右路攻勢傳中，基爾獲加「散步式」防守走甩伊斯美拿沙亞，後者快步衝前射成1比1完半場。
主場1:3不敵塞內加爾
換邊後英格蘭谷極唔起，塞內加爾62分鐘一次簡單後場長傳，哈比迪亞拉窄角度抽入。英格蘭喺84分鐘有祖迪比寧咸入波食「詐胡」，補時階段又有居迪斯鍾斯中場被逼甩，塞內加爾快速反擊由沙巴利「埋齋」，清脆贏3比1。
英格蘭之前21次對非洲球隊從未輸過，今次歷史性不敵塞內加爾後，杜曹話問題不大：「失望嘅戰果，塞內加爾係世界前20球隊，我要觀察球員喺呢種情況下比賽情況。好彩世界盃唔係聽日開波，我哋仲有1年時間準備。」
35歲老將基爾獲加今場正選上陣，但佢嘅速度大不如前，成為英格蘭「炸彈人」，曼聯名宿堅尼怒轟佢「防守懶散」兼「唔上心」，英國各大媒體評分都畀佢全場最低。第96次為國家隊披甲嘅獲加，經過今次「試用」失敗睇怕再冇機會。